"ശാരദാ!!!!"
ഈ വിളികേട്ട് ആയിരം തവണയെങ്കിലും ബാല്യത്തില് ഞെട്ടി വിജൃംഭിച്ച് നിന്നിട്ടുണ്ടാവും. എന്നാലും എന്തൊരു കൊലവിളിയാണത്. പാവല്ലേ? നവയൗവ്വനക്കാരിയ്ക്ക് ഒരു സ്വപ്നംകൂടി കണ്ടൂടെന്നാണോ? എത്ര നല്ല സ്വപ്നമായിരുന്നു! പൂമാലയിടുന്നതും ചുറ്റി നടക്കുന്നതുമൊക്കെയല്ലേ?
അവനും സ്വപ്നം കാണുകയായിരുന്നു. അവള്ക്കുവേണ്ടി അവനോടൊപ്പം എണീറ്റു നിന്ന് വാദിക്കാന്കൂടി നമ്മള് തയാറായി. എന്നിട്ട്, നമ്മളെല്ലാവരും കാളകളായി. ഋഷഭം.
മ്പേ...
ഇത്രയും കഥകളോര്ത്ത് ചങ്കില് സങ്കടക്കടന്നല് കുത്തുമ്പോഴേക്കും ആയിരാം തവണ മുടന്തിയും മടിച്ചും ലേശം വലിഞ്ഞും തിരിയുന്ന മാഗ്നറ്റിക് ടേപ്പില് മേളക്കൊഴുപ്പില്ലാതെ അടുത്ത പാട്ടു തുടങ്ങിയിട്ടുണ്ടാവും.
''പലുകേ ബംഗാരമായെന..." ശങ്കരാഭരണം സിനിമയില് ശങ്കര ശാസ്ത്രികളുടെ മകള് ശാരദയെ മാസ്റ്റർ പെണ്ണുകാണാന് വന്നപ്പോള് അവള് പാട്ടുപാടുകയും സ്വപ്നം കാണുകയും ആ ശുദ്ധ ഹിന്ദോളരാഗത്തില് കയറി വരാന് പാടില്ലാത്ത ഒരു രിഷഭം (ഋഷഭമല്ലെന്ന്) അതില് കയറി വന്ന് പുല്ലുകടിച്ചു നില്ക്കുകയും ചെയ്തപ്പോള് എല്ലാരേം ഞെട്ടിച്ച് ശാസ്ത്രികള് വിളിച്ച വിളിയാണ്
"ശാരദ!!!!" എന്ന്.
ടേപ്പ് റിക്കോര്ഡറില് കാസറ്റ് തിരിച്ചും മറിച്ചുമിട്ട് ഓരോ തവണ ഇതു കേള്ക്കുമ്പോഴും 'ശാരദ പാവം' ന്ന് ഓര്ത്ത് സങ്കടം വരികേം ചെയ്യും.
കാള കയറിവരാത്ത ആരോഹണവും അവരോഹണവും ശാസ്ത്രികളുടെ കർപ്പൂരം കത്തിച്ചു പൊള്ളിയ കയ്യില് വെണ്ണ തേച്ചു കൊടുക്കവേ അവള് പാടുമ്പോള്...
ന്റെ എസ്. ജാനകീ നിയ്ക്ക് ഇപ്പഴും പൊട്ടിക്കരയാന് തോന്നും. ആ ചങ്ക് വേദന പിന്നെ പോണത് ശാസ്ത്രികള് എണീറ്റ് ആ വെണ്ണയൊക്കെ ശാരദയുടെ സാരിയിലും തലയിലും തേയ്ക്കുമ്പോഴാണ്.
(എന്റെ സിനിമാസ്വാദനത്തിനു വിലങ്ങു തടിയാവാറ് ഇത്തരം മൈന്യൂട്ട് കാരണങ്ങളാണ്)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ