ചക്കവട തിന്നിട്ടുണ്ടാവും; നിങ്ങക്കൊക്കെ പണ്ടേ പരിചയമുള്ളതാവും എന്നൊക്കെ കരുതിയാണ് ചക്കവടയുടെ കാര്യം ഇത്രനാളും മിണ്ടാതിരുന്നത്. ഇനിയിപ്പോൾ ചക്ക മുഴുവൻ പഴുത്തു ചീഞ്ഞിട്ടാണോടീ ചക്കവടയുടെ കാര്യോം പറഞ്ഞു വരുന്നത് എന്ന് മൂക്കുന്നവരോട് ഇതിന്റെ പഴുത്ത വേർഷൻ അവസാനം കൊടുത്തിട്ടുണ്ടെന്ന് സൂചിപ്പിച്ചോട്ടെ?
...ഊം?
സൂചിപ്പിച്ചു. ഇനി തുടങ്ങാം.
പ്രതിരോധങ്ങളേതുമില്ലാതെ മിക്സിയിലരയാൻ പാകത്തിൽ പച്ചച്ചുള അരിയുന്നത് നിങ്ങടെ ഇഷ്ടം.
ഒരിഞ്ച് ഇഞ്ചി ഇഞ്ചിഞ്ചായി നുറുക്കണോ അതോ ചക്കയ്ക്കൊപ്പം അരയ്ക്കണോ എന്നതും നിങ്ങടെ ഇഷ്ടം.
ഉശിരൻമാരെ ഇഷ്ടമാണെന്നോ? മിറ്റത്ത്ന്ന് രണ്ടുമൂന്നു കാന്താരി പറിച്ച് മിക്സിയിലുപേക്ഷിയ്ക്കൂ.
ഉപ്പിനു പിന്നെ ആദിമദ്ധ്യാന്തമില്ല. സർവാത്മനാ സ്വാഗതം.
ഒരിറ്റു വെള്ളമിറക്കാതെ അരച്ച ചുളയിലേയ്ക്ക് അരിഞ്ഞ സവോളയും പച്ചമുളകും കരിവേപ്പും മനസ്സറിഞ്ഞ് ചേർക്കൂ- ഇഷ്ടമെങ്കിൽ മാത്രം.
നേരത്തെ സംഭരിച്ചു വെച്ച നേരും നെറിയും നേർമയുമുള്ള പച്ചരിപ്പൊടി തൂവി വടമാവ് പ്രേമപൂർവം കുഴച്ചെടുക്കില്ലേ?
അരിപ്പൊടി കൂടി മാവിന് മുറുക്കം കൂടിയാൽ വടയുടെ മുറുക്കം കൂടുമെന്നും അരിപ്പൊടി കുറഞ്ഞ് മുറുക്കം കുറഞ്ഞാൽ abdomenal fat deposit പോലെ വടയും മൃദുലലോലനായി എണ്ണ കുടിച്ചു മദോന്മത്തനായി ഡയപ്പറ് തൂങ്ങിയ കുഞ്ഞിനെപ്പോലെ കുതിർന്ന ടിഷ്യൂ പേപ്പറിൽ ദീർഘകാലം പോസ് ചെയ്യുമെന്നും ഓർമ്മിപ്പിയ്ക്കുക മാത്രമാണ് ഇവിടെ എന്റെ ദൗത്യം.
ഇഷ്ടമുണ്ടെങ്കിൽ മാത്രം ആ മാവ് ചൂടായ എണ്ണയിൽ ഒന്നു വറുത്തുകോരൂ. തന്നിഷ്ടപ്രകാരം ഇത്രയുമൊക്കെ ചെയ്തതും പോരാ എനിക്കു ദക്ഷിണ വെക്കാതെ തിന്നാനാണ് പരിപാടിയെങ്കിൽ... ശോഭനമായ പ്രകൃതി നേരുന്നു.
പച്ചച്ചുള + ഇഞ്ചി + കാന്താരി + പച്ചമുളക് + സവോള + കറിവേപ്പില + അരിപ്പൊടി + ഉപ്പ്. മനസ്സിലായല്ലോ? വറുത്തെടുക്കാൻ എണ്ണയും.
മധുരവട.
പഴുത്ത ചുള നന്നായി അരച്ചെടുക്കുക. ജീരകം, ഉണക്കത്തേങ്ങ നുറുങ്ങനെ അരിഞ്ഞത്, ലേശം പൻസാരയോ ഒരു കഷ്ണം ശർക്കരയോ. പിന്നെ അരിപ്പൊടി കുറച്ചധികം( മധുരം കാരണം വലിയും കുടിയും കൂടും)
വടയായി വറുത്തെടുത്ത് സുഖമായി തിന്നൂ.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ